高爾彭馬壓比寧咸　膺英格蘭年度最佳球員

英格蘭新星高爾彭馬過去1年極速上位，周三(9日)更力壓祖迪比寧咸同布卡約沙卡，獲選為英格蘭年度最佳球員。

22歲嘅高爾彭馬上季加盟車路士後，表現大爆發，依家為英格蘭備戰歐國聯嘅佢，周三獲頒英格蘭23/24球季最佳球員獎，呢個獎係由公眾投票選出，祖迪比寧咸同布卡約沙卡分別排第2同第3位。

高爾彭馬係繼2010年嘅艾殊利高爾後，首個得獎嘅車路士球員。呢位新星上年11月先首次代表英格蘭，至今上陣9場入2球，其中1球係歐國盃決賽攻破西班牙大門。