麥巴比「詐傷」拒踢歐國聯　迪甘斯回應有骨

皇馬球星基利安麥巴比早前聲稱有傷，拒絕為法國出戰嚟緊2場歐國聯，但呢位25歲射手上場西甲仍然有份上陣，並擔任正選，引起法國球迷不滿，批評佢對國家隊冇承擔。法國主帥迪甘斯回應話，始終係皇馬出糧畀麥巴比，佢將球會擺第1位亦無可厚非，似乎暗寸「麥總」認錢唔認人。

迪甘斯被傳媒問到麥巴比「詐傷」唔肯入選國家隊，佢話：「麥巴比係所有人嘅焦點，但當國家隊同球會出現利益衝突時，麥巴比選擇球會，亦無可厚非，畢竟球會先至係支付薪酬一方。」基利安麥巴比早前曾經受傷，雖然已經復出，但佢似乎想趁國際賽檔期休息，留力為皇馬搏殺，「麥總」近期踢國際賽表現欠佳，近5次上陣都冇波入。

此外，上場德甲射入1球嘅拜仁慕尼黑中堅烏柏美卡奴受傷退隊，迪甘斯已補選西維爾中堅洛斯巴迪，法國將於周五(11日)凌晨歐國聯對以色列，4日之後鬥比利時。