葉士域治主將騎呢受傷　幾乎斷指面臨長抖

球員傷患向來係比賽一部份，不過英超球會葉士域治主將杜安薛比，近日發生騎呢意外搞到幾乎斷手指，已經做手術治療，領隊基蘭麥基拿證實呢位守將面臨長時間養傷。

據英國《每日郵報》報道，26歲嘅杜安薛比日前喺屋企洗碗期間發生意外，手指公被嚴重割傷，一度有失去成隻手指嘅憂慮，好在經過手術後成功保番隻手指。

葉士域治領隊基蘭麥基拿表示：「杜安薛比隻手受傷，係一次好不幸嘅意外，佢做咗手術要抖一段時間，應該唔係幾個星期，似係更長時間，我哋仲尋求緊專家意見。」

曼聯出身嘅杜安薛比上年加盟葉士域治，今季喺6場英超正選上陣，佢今次受傷，對今季仍未贏過波嘅葉士域治係重大打擊。