曼聯新希望　14歲「小美斯」跳級升上U18

曼聯一隊球星表現欠佳，反而青年軍有唔少具潛力小將正在冒升，根據英國傳媒報道，年僅14歲前鋒約瑟夫加比爾因為表現大超班，近日跳級獲提升上曼聯U18比賽，前途無可限量，將來可能成為曼聯救星。

約瑟夫加比爾13歲已成為曼聯U16主力，並有份代表曼聯U16訪港比賽，當時上陣2場入2球及1次助攻，當選賽事最佳球員，表現更勝名宿朗尼嘅囝囝阿Kai，今季對紐卡素U16，更加上演帽子戲法。

由於約瑟夫加比爾技術出眾，擅長盤扭，因而有「小美斯」之稱，據悉巴塞隆拿亦對佢虎視眈眈，曾經送出西甲門票邀請佢睇巴塞隆拿比賽，明顯想招攬約瑟夫加比爾加盟。

曼聯今次提升約瑟夫加比爾上U18，相信係希望佢留隊。