高普担任红牛足球主管　可随时接手德国队

今夏离开利物浦嘅高普宣布复工，不过唔系教波，据报佢将会出任红牛足球全球策略主管，合约包括可随时解约接手德国队，高普本人亦喺个人社交平台“官宣”。

高普执教利物浦9年后表示“能量耗尽”，但估唔到休息5个月就已经“回够电”，不过佢复工并非担任某支球队嘅主教练，咁又唔算呃人，而且做嘅职位比主教练高好多级，层次都唔同。

高普为利物浦留下一个强劲阵容班底，畀新帅施洛继承，而施洛亦顺利交接，领军10战9胜1负，联赛排紧榜首；至于高普嘅新工作，就系主管红牛所有球队事务，包括RB莱比锡、萨尔斯堡同纽约红牛等队，球队嘅比赛理念，为球员同教练培养同转会提供建议。

较为特别嘅系，高普同红牛嘅合约特别加多一项条款，就系当德国国家队邀请佢执教时，高普有权随时解约离职，德国早前同拿高斯文续约至2026世杯，换句话说，如果拿高斯文到时约满离队，德国邀请高普接手，红牛就要放人。