車路士爆「黃禍」　馬利斯卡：又唔使我找數

車路士今季成績回勇，球員嘅戰意同侵略性都明顯提升，不過同時引起「黃禍」問題，球隊拎黃牌數字冠絕全英超，上場聯賽對森林又有6名球員拎黃牌，今季第2次被英格蘭足總罰款，但領隊馬利斯卡就呼籲球員保持呢種踢法，抵死表示：「(罰款)又唔使我找數！」

車路士上季拎到105張黃牌，打破英超史上單季最多黃牌紀錄，今季到依家又拎咗27張黃牌列英超之冠，韋斯利科芬拿同古古列拿上場對森林拎牌後，成為今季頭2個因累積5面黃牌要停賽球員，兩人將要喺下輪作客利物浦坐波監。

對於「黃禍」問題，馬利斯卡表示：「呢樣嘢係需要改善，但我好鍾意佢哋嘅鬥志，如果係因為呢種踢法(導致黃牌)，我睇唔到有咩問題，(罰款)又唔使我找數！當然有部份情況要控制得更好，不過講到士氣、鬥志、團結，我就睇得好開心。」