人工智能預測　C朗2028年8月實現千球偉業

葡萄牙球星C朗拿度已經39歲，不過落到球場寶刀未老，上個月攻入足球生涯900球後，曾表明會以1,000球為終極目標。最近有人工智能程式預測，C朗將會喺2028年實現呢個夢想。

博彩公司Casadeapustas Bet最近用AI程式計算C朗嘅「千球時間表」，分析顯示C朗到明年2月40歲生日之後，入球率將會開始下跌，預計去到2028年嘅8月15日，就可以攻入個人第1,000球。

如果呢個預測準確，到時C朗已經43歲，而且仲有機會踢埋2026年世界盃同埋2028年歐國盃。有趣嘅係，AI仲預測埋到C朗入1,000球嗰陣，如果美斯仍未退休，佢到時嘅入球數會係923球。

C朗今季喺艾納斯各項比賽上陣9場入8球，目前足球生涯累積905個入波，佢上個月曾表示：「如果冇受傷患影響，我想入1,000球，呢個會係我足球生涯一大指標。」