阿根廷僅和委內瑞拉　美斯狂插「游泳池」

周五(11日)朝早世盃外南美洲區賽事，阿根廷雖然有「球王」美斯復出，但作客只能同委內瑞拉踢成1比1平手。美斯賽後狂插委內瑞拉球場情況惡劣，草皮變成「游泳池」，令阿根廷連波都交唔到。

阿根廷有美斯相隔3個月後再次披甲，13分鐘美斯嘅罰球令門前出現混亂，奧達文迪亂軍中撞入領先，不過由於草地差劣加上天雨，令球場積水變成「游泳池」，阿根廷表現明顯失色，委內瑞拉下半場由荷西朗頓接應傳中頭槌頂入，雙方踢成1比1完場。

美斯賽後炮轟球場情況：「好難踢，球場令比賽變到好醜陋，我哋唔能夠連續傳2腳波，失分係因為球場情況唔容許阿根廷踢自己嘅足球。上半場我哋嘅傳送都被水停住，喺水戰下阿根廷已經做到最好。」阿根廷喺南美洲區仍以19分排榜首，晉級世盃決賽周實食冇黐牙。