阿根廷仅和委内瑞拉　美斯狂插“游泳池”

周五(11日)朝早世杯外南美洲区赛事，阿根廷虽然有“球王”美斯复出，但作客只能同委内瑞拉踢成1比1平手。美斯赛后狂插委内瑞拉球场情况恶劣，草皮变成“游泳池”，令阿根廷连波都交唔到。

阿根廷有美斯相隔3个月后再次披甲，13分钟美斯嘅罚球令门前出现混乱，奥达文迪乱军中撞入领先，不过由于草地差劣加上天雨，令球场积水变成“游泳池”，阿根廷表现明显失色，委内瑞拉下半场由荷西朗顿接应传中头槌顶入，双方踢成1比1完场。

美斯赛后炮轰球场情况：“好难踢，球场令比赛变到好丑陋，我哋唔能够连续传2脚波，失分系因为球场情况唔容许阿根廷踢自己嘅足球。上半场我哋嘅传送都被水停住，喺水战下阿根廷已经做到最好。”阿根廷喺南美洲区仍以19分排榜首，晋级世杯决赛周实食冇黐牙。