巴西靠2位土炮救駕　驚險反勝智利

周五(11日)早上世界盃外圍賽南美洲區賽事，陷入低潮嘅巴西幾乎又出事，開波唔夠2分鐘就落後，全靠2位效力巴甲球隊保地花高嘅前鋒伊高捷西斯、路爾斯軒歷基各入1球，作客驚險以2比1反勝智利，令備受下台壓力嘅領隊杜利華祖利亞暫時鬆一口氣。

巴西之前6場世盃外僅1勝，今場缺少受傷嘅皇馬翼鋒雲尼斯奧斯祖利亞，中堅艾達米列達奧、利物浦門將艾利臣比加，實力受削之下迅速失波，被智利前鋒伊度亞度華加斯頂破大門。

其後智利繼續創造唔少攻勢，但都未能把握，巴西站穩陣腳之後開始反攻，並喺上半場補時，由伊高捷西斯頂入扳平1比1。

換邊之後，巴西開始佔上風，並由後備上陣嘅路爾斯軒歷喺89分鐘勁射入網，絕殺對手。值得一提，路爾斯軒歷、伊高捷西斯今季巴甲分別有6、5球進帳，成為保地花高排榜首嘅功臣，2人延續球會神勇表現，帶動「森巴兵團」走出困境，巴西贏波之後，排南美洲區第4位。