曼聯新兵心臟問題做手術　可完全康復

曼聯又再受傷病問題困擾，今夏由拜仁慕尼黑加盟嘅馬沙拉奧，因心悸問題周四(10日)進行手術治療，預計要缺陣數個星期，幸好佢嘅心臟問題唔算嚴重，曼聯預期呢位摩洛哥國腳可以完全康復。

26歲嘅馬沙拉奧喺上場聯賽對維拉半場被換走，之後更退出摩洛哥國家隊大軍，檢查後發現有心悸問題，並即時進行一次預防性矯正手術，消息指呢個手術相對常見同簡單，預計馬沙拉奧可以喺數個星期後重返球場，並可以完全康復。

馬沙拉奧今夏加盟曼聯後，7場英超全部正選上陣，係「紅魔鬼」暑假一眾新收購入面表現最對辦嘅一個，但依家連佢都缺陣，加上勞基梳爾同杜維爾馬拉西亞仲養緊傷，達洛治成為曼聯唯一健康嘅閘位球員。