賽馬會菁英盃 冠忠南區九龍城乘勝追擊
2024年10月11日 19:20
東網電視
更多新聞短片
賽馬會菁英盃：冠忠南區 vs 九龍城
【東網按次收費直播】
「賽馬會菁英盃」周六（12日）開鑼，首日安排兩場B組激鬥，頭場上季首奪賽事冠軍的標準流浪，於旺角大球場迎戰理文（on.cc東網周六下午3時按次收費直播）；尾場青衣運動場上演「地區打吡」，冠忠南區硬撼近況不俗的九龍城（on.cc東網周六晚6時按次收費直播），兩場搶分騷火花十足！
南區上場擊敗均業北區，聯賽打開勝利之門，周六轉戰「賽馬會菁英盃」，雖有伍瑋謙及史提芬彭利拿代表「大港腳」缺陣，但主教練楊正光有信心其他球員能頂替兩人空缺：「今季球隊陣容深度唔錯，另一門將Sky（顏翱天）實力有番咁上下，而Sohgo（趙聡悟）外借加盟後亦幫到手，值得委以重任。」陣容方面，雖然艾華再度因傷缺陣，但好消息是亞哥斯達刑滿復出，李小恆已獲發特區護照，令人腳調動有更多變化。
陳潤潼：對手有進步唔易啃
右閘陳潤潼指出，球隊雖曾於「高級組銀牌」擊敗九龍城，惟他認為對手近期表現愈見進步，加上部分賽事適齡球員已站穩正選，形容今仗「唔易啃」：「何瀧浩同嚴啟倬兩位U22球員，喺聯賽踢開正選上晒力，加上李根好同韋利安帶得起隊波，佢哋實力比啱啱開季時好好多。」
九龍城近期成績有顯著改善，聯賽錄得兩連勝，主教練陳銘剛認為目前隊內士氣良好，盼乘勝追擊：「球隊近排幾順，有信心可以同任何對手咬到最後，要保持住呢股氣勢踢場好波，畀球迷睇到我哋嘅進步。」「剛sir」呼籲隊中小將把握機會累積經驗，為聯賽做好準備。
徐竟柔盼嚴防基哥利佐佐木周
徐竟柔（Isaac）表示九龍城作為新升班球隊，目前成績已有所交代，期望盃賽能走得更遠：「『阿濤』（曾錦濤）開季前講過，想喺盃賽有啲成績，『菁英盃』係我哋其中一個好重視嘅賽事，希望打入淘汰賽，甚至衝擊冠軍。」談到今場對手，Isaac形容基哥利及佐佐木周等人能力不俗，會與隊友互相補位，嚴防對手突擊。
【兩隊預計正選陣容】
冠忠南區
門將：31.顏翱天
後衞：2.陳潤潼 4.川瀨浩太 14.宋柱浩 16.翟廷峯
中場：10. 亞哥斯達 6.基斯 19. 趙聡悟
前鋒：20.游卓峰 9.基哥利 17.李小恆
九龍城
門將：88.袁皓俊
後衞：21.曾錦濤 3.韋利安 20.嚴啟倬 2.余沛康
中場：8.邵昀俊 5.迪高 23.何瀧浩
前鋒：25.許嘉樂 27.卡朗 77. 歐陽浩銘