阿仙奴大鑊　布卡約沙卡「為國捐軀」

英格蘭上場歐國聯1比2不敵希臘之外，仲有翼鋒布卡約沙卡受傷退下火線，可能缺陣下場對芬蘭，甚至影響為阿仙奴出戰10月20日凌晨英超作客般尼茅夫，兵工廠主帥阿迪達今次真係頭痕。

布卡約沙卡踢到51分鐘傷出，由馬杜基入替，賽後「三獅兵團」看守領隊卡斯利話：「沙卡已經接受傷勢評估，失波之前，佢嘅腳部已經開始有唔妥。」一般估計呢位23歲翼鋒好可能缺陣下周一(14日)凌晨歐國聯作客芬蘭。

布卡約沙卡今季為阿仙奴上陣10場入3球及7次助攻，屬於球隊進攻重要力量，兵工廠球迷都好擔心佢會步隊友馬田奧迪加特後塵，呢位挪威國腳上月踢歐國盃受傷之後，一直缺陣，如果連沙加都出事，阿仙奴爭標之路肯定受嚴重打擊。