相隔3年！車路士領隊奪英超每月最佳

英超官方宣布9月最佳領隊，車路士新帥馬利斯卡當選，相隔3年再有車路士領隊膺此獎項，攻擊主力高爾彭馬亦順利當選9月最佳球員。

車路士9月份4場英超共取得3勝1和，包括1比1和水晶宮、1比0贏般尼茅夫、3比0贏韋斯咸及4比2贏白禮頓。9月份最佳領隊競爭激烈，候選名單包括阿迪達、艾美利、富咸同施洛，其實施洛都好勁，佢9月份成績3勝1負，就因為利物浦爆冷輸畀諾定咸森林，先至僅僅不及馬利斯卡。

至於9月最佳球員，就由車路士嘅高爾彭馬當選，佢喺9月份4場比賽交出5球1助攻，其中主場對白禮頓喺上半場個人獨取4球食出大四喜，繼上季尾4月之後，生涯第2次當選。

車路士對上一次有領隊當選每月最佳，係3年前2021年10月嘅杜曹，如果領隊同球員一齊當選就仲耐，要數到2016年11月干地同迪亞高哥斯達。