坦哈格又安全啲　修夫基無意執教曼聯

英格蘭前領隊修夫基今夏離任，至今未有新工作，佢日前接受訪問時表明，未來一年都唔會教波，閂咗自己接手執教曼聯嘅大門，坦哈格又驚少樣。

除杜曹外，修夫基係畀人談論最多嘅曼聯新帥候選人，今年3月曾有報道指修夫基名字出現喺拉特克利夫名單上面，當時曼聯只要畀80萬鎊就可以令英足總放人，當時修夫基對於傳聞仲有回應添，佢話踢埋歐國盃至算。

歐國盃決賽再落敗，修夫基今夏決定唔再做三獅主帥，不過當時曼聯未能同杜曹達成協議，並決定同坦哈格續約一年，咁就冇再搵修夫基。點知曼聯開季成績急跌，表現奇差，坦哈格再聞魷魚香，曼聯再度嚟到換帥時刻，修夫基再被人談論。

修夫基近日回應幾時再執教嘅問題，佢話：「我嚟緊一年都唔會執教，而且好肯定，因為我需要時間決定將來行邊條路，不過我好高興收到咁多邀請。」