唔踢歐國聯真相曝光　麥巴比被踢爆去瑞典夜蒲

皇馬球星基利安麥巴比早前稱聲有傷，拒絕為法國出戰歐國聯，但被瑞典媒體《Aftonbladet》踢爆，佢趁國際賽檔期，飛去瑞典度假，並到夜店喪玩，恐怕會進一步激嬲法國球迷。

據悉基利安麥巴比約埋效力利華古遜嘅法國後衞洛迪梅基尼一齊去瑞典斯德哥爾摩玩，首先去一間名為「朱莉之家」嘅餐廳食法國菜，跟住聯同幾位朋友坐車去夜店。眾人進入夜店時，都需要交出手機，可見保安非常嚴密，禁止任何人入內拍攝，麥巴比將於下周二(15日)返回皇馬操練。

麥巴比表示有傷唔踢今個月2場歐國聯後，上輪西甲仍然有上陣，加上今次被踢爆去瑞典夜蒲，令人更加相信佢故意拒絕為國家隊披甲，呢位前鋒好難向法國球迷交代。