艾歷臣明夏離開曼聯　或重投阿積士

正在為丹麥備戰歐國聯嘅基斯甸艾歷臣接受丹麥媒體《Ekstra Bladet》訪問時，承認冇同曼聯商討續約問題，自己亦唔打算續約，意味呢位32歲中場將於明夏自由身離隊，盛傳可能重返荷甲球隊阿積士。

基斯甸艾歷臣上季已失去曼聯正選位置，會方曾經計劃今夏出售佢，但冇球會接貨，因此繼續留隊，履行最後1年合約。呢位老將被《Ekstra Bladet》記者問到會唔會續約，佢直接答：「唔會，我哋亦冇傾過。」

艾歷臣2022年7月以自由身由賓福特加盟曼聯，至今上陣80場入6球及16次助攻，佢最快可於明年1月開始同其他球會傾加盟事宜，據悉阿積士願意向基斯甸艾歷臣開出一份3年合約，畀佢效力至退役。

艾歷臣出身於阿積士青年軍，效力一隊4季上陣162場入32球，其後轉投熱刺，走上成名之路，重返母會掛靴，都係一個唔錯選擇。