奠定王牌地位　耶馬獲西班牙10號波衫

西班牙將於周日(13日)凌晨歐國聯主場對丹麥，賽前宣布17歲新星拉明耶馬獲得代表王牌球員嘅10號球衣，正式奠定「鬥牛兵團」絕對主力地位。

拉明耶馬近年迅速冒起，喺今屆歐國盃射入1球及4次助攻，成為西班牙奪得冠軍嘅功臣，上月歐國聯對瑞士，佢又貢獻1次助攻，幫球隊大勝4比1，無疑係西班牙鋒線上最具威脅人物，今次獲得10號球衣，絕對實至名歸。

事實上，拉明耶馬正在行當年美斯之路，今季改着美斯出道初期嘅巴塞隆拿19號球衣，由於現時巴塞10號仔安素法迪只屬後備球員，好可能被球會出售，相信不久將來，拉明耶馬應該會着巴塞10號。