離隊後表現出色　曼聯回購艾華路費南迪斯

曼聯離隊球員有好表現已成常態，最近又有一位，今季轉投賓菲加嘅21歲左閘艾華路費南迪斯，早前喺歐聯表現出色，受到各大豪門關注，咁啱曼聯左閘位置薄弱需要人手，據報曼聯將啟動回購條款，買番該位小將。

艾華路費南迪斯曾屬皇馬青訓成員，2020年加盟曼聯後從未為一隊上陣，2022年開始先後外借到普雷斯頓、CF格蘭納達及賓菲加，今季正式轉會賓菲加，轉會費總值900萬歐元，解約金5,000萬歐元，不過曼聯有回購條款。

轉投賓菲加後，艾華路費南迪斯今季上陣8場，包括7場葡超及1場歐聯，包括歐聯主場大炒馬體會4比0，當選為全場最佳球員，因而受到歐洲各豪門關注。

曼聯今季實際上欠缺左閘，近幾場都由達洛治客串，管理層睇見艾華路費南迪斯踢得咁好，因此打算啟動回購條款，買佢番嚟頂檔。