蘇比文迪成功接棒　西班牙冇洛迪照贏波

西班牙喺中場靈魂洛迪卡斯簡迪重傷後，周日(13日)凌晨首戰歐國聯照贏波，「狂牛兵團」憑代替洛迪嘅蘇比文迪一箭定江山，主場1比0小勝丹麥，喺A4組以3戰得7分排榜首。

效力皇家蘇斯達嘅蘇比文迪一直備受好評，不過國家隊防中位置一直由洛迪霸佔，隨住呢位曼城球星重傷長抖，蘇比文迪就有上位機會。西班牙今場佔盡優勢，全場有多達25次攻門，可惜艾華路莫拉達同拉明耶馬連番失機。去到79分鐘，蘇比文迪推至娥眉月頂勁射，丹麥門將卡斯柏舒米高甩手入網，西班牙就靠呢個入波小勝1比0。

蘇比文迪今仗喺中場控制攻守，表現獲領隊富安迪大讚：「用蘇比文迪唔係賭博，而係必勝嘅一步，佢非常之冷靜，做決定好好，佢畀到球隊所有需要嘅嘢，蘇比文迪入波或者唔係太多，但已經融入國家隊嘅節奏。」據報曼城、利物浦都對蘇比文迪虎視眈眈，有機會喺1月轉會窗提出收購。