苏比文迪成功接棒　西班牙冇洛迪照赢波

西班牙喺中场灵魂洛迪卡斯简迪重伤后，周日(13日)凌晨首战欧国联照赢波，“狂牛兵团”凭代替洛迪嘅苏比文迪一箭定江山，主场1比0小胜丹麦，喺A4组以3战得7分排榜首。

效力皇家苏斯达嘅苏比文迪一直备受好评，不过国家队防中位置一直由洛迪霸占，随住呢位曼城球星重伤长抖，苏比文迪就有上位机会。西班牙今场占尽优势，全场有多达25次攻门，可惜艾华路莫拉达同拉明耶马连番失机。去到79分钟，苏比文迪推至娥眉月顶劲射，丹麦门将卡斯柏舒米高甩手入网，西班牙就靠呢个入波小胜1比0。

苏比文迪今仗喺中场控制攻守，表现获领队富安迪大赞：“用苏比文迪唔系赌博，而系必胜嘅一步，佢非常之冷静，做决定好好，佢畀到球队所有需要嘅嘢，苏比文迪入波或者唔系太多，但已经融入国家队嘅节奏。”据报曼城、利物浦都对苏比文迪虎视眈眈，有机会喺1月转会窗提出收购。