般費暗踩曼聯兩大缺點：踢國家隊更開心

般奴費南迪斯今季喺曼聯表現令人失望，冇波入之餘，仲連番食紅牌，但呢位中場返到國家隊，立即翻生，喺周日(13日)凌晨歐國聯貢獻1次助攻，幫葡萄牙擊敗波蘭。般費承認踢國家隊比較開心，並暗寸紅魔鬼伙食差，影響發揮。

般奴費南迪斯接受傳媒訪問時話：「曼聯現時情況麻麻，好耐冇贏過波，但國家隊好唔同，氣氛非常好，令人好自在，同隊友可以用母語溝通，食物亦更加好，令我踢國家隊可以發揮出高水平，當然亦要多得身邊高質素隊友幫助。」般費言下之意，似乎暗寸曼聯伙食唔掂，隊友能力亦不足。

不過，般奴費南迪斯亦承認自己今季表現差過預期，希望踢完國際賽之後，返到曼聯可以打破入球荒。