唔想踢人造草場　沙拿退出埃及大軍提早返英

埃及領隊哈辛周六(12日)證實，國家隊王牌前鋒穆罕默德沙拿已退出大軍，唔會出戰周三(16日)凌晨作客毛里塔尼亞嘅非國外，原因係沙拿唔想踢人造草場。

埃及周六主場2比0贏毛里塔尼亞，沙拿都有一個入波，埃及喺C組亦3戰全勝排榜首。不過周三輪到埃及作客毛里塔尼亞，沙拿就申請免役，哈辛表示：「如果有球員唔想喺人造草場踢波而要求免役，我會同意。毛里塔尼亞踢得好硬朗，甚至乎有啲暴力，我會批准沙拿嘅特別要求(唔踢)。」

沙拿提前返英國休息，對利物浦無疑係天大喜訊，「紅軍」中堅華基爾雲迪積克日前亦喺歐國聯食紅牌，因停賽關係提早回歸利物浦，兩大主力休養生息，有助英超「1哥」利物浦保持強勢。