維亞拿成曼城新總監　助「藍月亮」簽3大猛將

曼城總監碧格列斯坦將於季尾離任，會方已經搵到接班人，聘請前葡萄牙國腳維亞拿擔任新總監，將於明年6月正式上任。根據「轉會權威」記者羅曼諾(Fabrizio Romano)爆料，呢位41歲前紐卡素中場首項工作，將為「藍月亮」簽入士砵亭3位猛將基奧基尼斯、摩頓胡文特、奧士文尼迪奧文迪。

維亞拿球員時代喺士砵亭出道，其後轉投紐卡素，亦效力過西甲球隊華倫西亞，甚至曾經去阿聯酋搵食。佢掛靴後從事管理工作，先後擔任比蘭倫斯、士砵亭嘅總監，今次過檔曼城，出任相同職位，應該駕輕就熟。

據悉曼城之所以睇中維亞拿，除咗因為佢踢過英超及有管理經驗之外，最重要係同「球星搖籃」士砵亭關係密切，可協助「藍月亮」簽入高質新兵。

士砵亭現時最炙手可熱球員必定係前鋒基奧基尼斯，呢位26歲瑞典國腳上季葡超上陣33場入29球，今季踢7場亦已有10球進帳，被譽為「新伊巴謙莫域」，獲得阿仙奴等多間球會垂青，維亞拿成為曼城總監後，「藍月亮」有望捷足先登簽入佢。