角球旗桿打屁股　孫興民老竇虐兒罪成

南韓球星孫興民喺英超出名係好好先生，不過佢爸爸孫雄正早前捲入「虐兒」官司，周五(11日)被春川地方法院判罪名成立，孫雄正同另外兩名教練各被罰款300萬韓圜，並且要接受防止虐待兒童教育。

孫雄正喺南韓開設「孫氏足球學校」，據韓聯社報道，今年3月一個沖繩訓練營入面，有學員因為未能完成指定練習而被體罰，4位學員要趴喺地上，被教練用角球旗桿打屁股。孫雄正喺訓練期間亦不斷惡言辱罵。據報孫雄正曾對涉事學員及其家屬致歉，並提出以友好方式解決問題，但控方要求數億韓圜嘅和解金，令和解失敗。。

春川地方法院日前判決，孫雄正等3人罪名成立，消息指其中一個教練係孫興民嘅哥哥孫興潤，3人各被罰款300萬韓圜，並且要接受40小時嘅防止虐待兒童教育課程。