賽馬會菁英盃　「伊高」開紀錄：贏波感覺好正

「賽馬會菁英盃」周日（13日）於大埔運動場上演A組賽事，大埔最終以2比1擊敗東方，保住今季各項賽事的不敗之身，上半場為大埔率先打開紀錄的伊高沙托尼，表示自己非常享受勝利的喜悅，盼為大埔力爭更佳成績。

賽後伊高沙托尼對球隊於「菁英盃」旗開得勝表示高興：「每次幫球隊贏波都好開心，今場我有入到波，對自己有交代，嗰種感覺真係超級正。我覺得球隊今季心態上好積極，一路踢一路搵方法進步，所以我期待攞到比上季更好嘅成績。」

下半場雙方作出輪換後戰況激烈，大埔一度被東方扳平比數，他認為今場對手實力強勁，但在教練「堅Sir」的指揮下，大埔得以重新掌握局勢，成功踢出部署，最終保住3分：「對住東方一啲都唔易踢，佢哋嘅教練團同球員實力水準都相當好，不過我哋知道點樣去應付，『堅Sir』叫我哋多啲放膽去起腳射門，所以下半場我哋都搏盡晒。」「伊高」亦認為陣中的年輕隊友充滿潛力：「佢哋嘅實力同底子都唔錯，我相信佢哋遲啲一定會大把發揮空間，幫到球隊喺『菁英盃』出線。」