泰亞尼同羅渣士密斟　暗示重返些路迪

阿仙奴球星基蘭泰亞尼近年發展麻麻，夏天歐國盃受傷後至少仍未能復出，不過佢近日就現身些路迪一個慈善晚宴，而且被影到同些路迪領隊羅渣士密斟，傳佢重返該蘇超班霸嘅傳聞再度揚起。

27歲嘅基蘭泰亞尼喺些路迪出身，一直係球迷寵兒，2019年轉投阿仙奴後曾大發異彩，可惜之後因戰術同傷患原因失寵，今季雖然留喺阿仙奴，但一直處於養傷狀態。日前些路迪基金會喺倫敦舉行慈善晚宴，基蘭泰亞尼就罕見現身，仲同羅渣士雞啄唔斷。

基蘭泰亞尼同阿仙奴只剩18個月合約，據報「兵工廠」屬意將呢位左閘賣走，基蘭泰亞尼今夏亦曾暗示希望重返些路迪：「足球世界話唔埋，我同些路迪一直保持緊密聯繫，每一次轉會都一定會考慮埋些路迪，未來嘅事冇人知。」