曼聯1月割價賣馬古尼　1,000萬鎊有交易

英格蘭中堅哈利馬古尼喺曼聯嘅日子進入最後倒數，據英國《每日星報》報道，曼聯計劃喺1月轉會窗，優先考慮「割價」賣走哈利馬古尼，而且1,000萬鎊就有交易！

哈利馬古尼目前合約只剩9個月，雖然曼聯有權啟動續約1年條款，但呢位31歲中堅周薪高達20萬鎊，而且喺領隊坦哈格計劃中只係大後備，情況同夏天免費離隊嘅華拉尼情況相似。為免到季尾1毫子都收唔番，曼聯希望1月「割價」求售，只要1,000萬鎊就會答應放人。

坦哈格上年已曾極力賣走哈利馬古尼，但3,000萬鎊叫價加上高昂人工，令轉會未能成事。雖然唔受重用，不過哈利馬古尼每次上陣都交足功課，月初歐聯作客波圖就後備入替攻入追和1球，可惜佢上場聯賽受傷，預計要休戰數個星期。