有情有義！彭拿典奈高斯將履行巴鐸克合約

希臘國腳佐治巴鐸克上周四(10日)喺家中暴斃，世界球壇為之哀痛。據希臘傳媒報道，巴鐸克效力嘅希臘勁旅彭拿典奈高斯，決定會繼續履行夏天簽署嘅3年合約，令巴鐸克嘅家人生活得到保障。

巴鐸克效力錫菲聯7個球季，今個夏天先至轉會彭拿典奈高斯，可惜只係踢過4場比賽就與世長辭。巴鐸克離世後，遺下未婚妻同1歲大嘅仔，據報彭拿典奈高斯班主決定，繼續履行同巴鐸克所簽嘅3年合約，並會喺明年安排一場紀念場，為巴鐸克家人籌募生活經費。

希臘國家隊今個月喺歐國聯2連勝，球員贏波後都將勝利獻畀巴鐸克，周一(14日)凌晨主場擊敗愛爾蘭後，全體國腳拎住巴鐸克件2號波衫繞場一周，向呢位老朋友作出最後致敬。