有情有义！彭拿典奈高斯将履行巴铎克合约

希腊国脚佐治巴铎克上周四(10日)喺家中暴毙，世界球坛为之哀痛。据希腊传媒报道，巴铎克效力嘅希腊劲旅彭拿典奈高斯，决定会继续履行夏天签署嘅3年合约，令巴铎克嘅家人生活得到保障。

巴铎克效力锡菲联7个球季，今个夏天先至转会彭拿典奈高斯，可惜只系踢过4场比赛就与世长辞。巴铎克离世后，遗下未婚妻同1岁大嘅仔，据报彭拿典奈高斯班主决定，继续履行同巴铎克所签嘅3年合约，并会喺明年安排一场纪念场，为巴铎克家人筹募生活经费。

希腊国家队今个月喺欧国联2连胜，球员赢波后都将胜利献畀巴铎克，周一(14日)凌晨主场击败爱尔兰后，全体国脚拎住巴铎克件2号波衫绕场一周，向呢位老朋友作出最后致敬。