利物浦睇中「辛祖2.0」　同倫敦雙雄搶人

多蒙特新星比諾基頓斯今季成功上位，開季到依家已經入咗4球，據德國《圖片報》報道，利物浦最近派出球探考察該英格蘭U21國腳嘅表現，將會同車路士、熱刺拗手瓜搶人。

曼城青訓出身嘅比諾基頓斯，5年前已經轉去德國學法，被譽為「查頓辛祖2.0」，司職左翼嘅佢據報獲利物浦領隊施洛賞識，而且已派出球探去睇辦，車路士同熱刺都有派人去考察，3隊隨時爭崩頭。

報道指利物浦要為路易斯迪亞斯離隊做準備，呢位哥倫比亞翼鋒受到巴塞隆拿、巴黎聖日耳門等豪門挖角，「紅軍」本來首選左翼係紐卡素嘅安東尼哥頓，但對方早前已經續約，20歲嘅比諾基頓斯轉會費約2,500萬鎊至3,000萬鎊，相對上係更低風險同長遠投資。