冇水冇食物冇wifi！尼日利亚大军被困15小时

尼日利亚原定周三凌晨作客利比亚，进行非洲国家杯外围赛D组第4轮，不过依家睇嚟踢唔成，因为尼日利亚大军去到利比亚之后，被迫降落一个废弃机场，嗰度冇水冇食物冇wifi，球员滞留超过15小时，最后决定拉队回国，至于场波点安排就之后先算。

据报尼日利亚大军原定飞去利比亚城市班加西准备比赛，但降落前一小时被通知要改道去240公里外另一个废弃机场，成班球员抵埗后被困，嗰度冇水冇食物冇wifi，电话冇讯号，球员只可以喺机场大堂搵个位休息，咁嘅状态冇可能再比赛。

尼日利亚官方表示：“降落前一小时，原定在班加西降落嘅班机突然改道，去咗240公里外另一个地方。”队长杜斯特伊冈在社交平台留言：“我哋喺一个废弃机场滞留超过12小时，利比亚政府无故取消我哋班机降落许可，我哋电话冇讯号，冇水冇食物。”

报道指，今次事件据估计系利比亚报复行为，上轮利比亚作客尼日利亚期间，遭到多处刁难，包括检查行李一小时、交通延误三小时，队巴冇冷气等等，尼日利亚足总否认。

睇番尼日利亚名单，王牌射手域陀奥森汉冇入选，可谓逃过一劫，不过几位富咸、诺定咸森林同李斯特城球员就唔好彩，咁样搞一大轮，返到英超仲有冇力比赛呀。