曼聯換帥新目標　上季帶隊殺入歐聯決賽

當修夫基明言一年內唔教波、杜曹接手英格蘭、施蒙尼恩沙基話冇興趣教曼聯，坦哈格係咪安全？當然唔係啦，據報曼聯新股東拉特克利夫已經搵到新目標，佢就係上季率領多蒙特殺入歐聯決賽嘅德國籍教頭泰錫。

41歲嘅泰錫上季歐聯決賽爭冠失敗後宣布離隊，至今未有新工作，近日被「拉爵」列入新帥候選名單，坦哈格一旦落台，下任曼聯領隊隨時係佢。

泰錫最初在多蒙特青訓系統任教同教球探，做過高普助手，之後兩度執教多蒙特，報道指雖然泰錫生涯同曼聯冇正式接觸，但唔少曼聯球迷認識佢，主要因為上教練班時期，同曼聯名宿尼曼查維迪做過同學，佢亦做過韋斯咸助教，擔任比歷副手，有一定英超經驗。

曼聯決定再畀機會坦哈格領軍，不過一般相信亦係最後機會，如果呢段時間無法提升成績，就會有新帥接手。