阿仙奴大鑊　馬天尼利都傷埋

今個國際賽賽期阿仙奴相當黑仔，繼日前布卡約沙卡受傷，宣布退出英格蘭國家隊之後，巴西國腳加比爾馬天尼利亦出現右小腿肌肉水腫，正接受治療，現時巴西足總同阿仙奴保持聯繫，隨時進行通報。

布卡約沙卡於英格蘭對希臘一戰受傷，當時「沙卡仔」摸住大腿後部，賽後一拐一拐離場，並已返回阿仙奴檢驗傷勢及退出國家隊，如果驗出係大傷，對阿仙奴今季爭標將造成重大打擊。

加比爾馬天尼利今季雖然並非阿仙奴必然正選，但都交出2球2助攻數據，近日佢為巴西國家隊出戰世盃外，巴西足總發布醫療公告，確認馬天尼利右小腿肌肉水腫，幸好只係小範圍受傷，正進行治療，巴西嚟緊仲要對秘魯，未有消息話馬天尼利會否退出國家隊。