時來運到！利維寧首演入波　德國1球挫荷蘭

周二(15日)凌晨歐國聯A3組大戰，殘陣出擊嘅德國主場1比0力挫荷蘭，因接連有球員受傷意外擔正嘅利維寧，國際賽首演即時來運到，一箭定江山做英雄，連領隊拿高斯文都承認：「估唔到佢踢得咁好！」

效力史特加嘅23歲翼鋒利維寧，最初並冇入選德國今期大軍，後來因穆斯亞拿受傷退隊先獲補選，原本諗住慢慢見識下國家隊運作，點知上場入2球嘅前鋒安達夫日前受傷，令利維寧有機會正選上陣。利維寧首演2分鐘就送個波入網，點知VAR長時間覆核後判越位，以為運氣用完，結果64分鐘再籍荷蘭解圍角球失敗，亂軍中起腳抽入全場唯一入球。

德國領隊拿高斯文賽後表示：「球隊今場行前一大步，絕對值得贏波。我畀咗利維寧一個大驚喜(正選上陣)，但我估唔到佢踢得咁好，幾次緊急情況都處理得好好。」至於利維寧就謙虛表示：「雖然係我入波，但呢場係團隊嘅勝利，好開心我幫到手。」