麦巴比被控强奸接受调查　暗示PSG幕后搞鬼

法国球星基利安麦巴比卷入强奸丑闻！据瑞典媒体报道，呢位皇家马德里前锋被指喺上周四(10日)瑞典度假期间，喺酒店性骚扰及强奸一名女子，当地警方正进行调查。麦巴比随后发声明炮轰“假新闻”，更暗示即将同佢进行欠薪官司嘅旧东家巴黎圣日耳门(PSG)，系事件幕后黑手！

因伤未有入选法国国家队嘅麦巴比，上周被影到同朋友去瑞典夜蒲，点知就卷入强奸风波。据瑞典报章《Aftonbladet》报道，一名女子喺上周六(12日)去医院求医，报称2日前喺斯德哥尔摩中部一间酒店被麦巴比强奸，警方接报后派出警员同法医去事发现场搜证。

麦巴比上周四被影到现身斯德哥尔摩，先去法国餐厅食饭，再到一间叫V嘅夜总会玩，而且入场人士都要交出手机，最后同朋友坐黑色货Van返酒店，第2日(11日)就坐私人飞机返法国。瑞典警方发言人维克度未肯证实疑犯身份：“案件已交畀检控官处理，我哋唔会有任何评论。”

25岁嘅麦巴比随后喺社交网强烈反击，分享呢单案件嘅报道并留言：“假新闻！！！”麦巴比更将矛头指向PSG：“完全系意料之中，‘咁啱’喺聆讯之前出现。”麦巴比所指嘅聆讯，系佢向PSG索偿5,500万欧元拖欠奖金同薪酬嘅官司，呢单官司周二(15日)会喺法国展开聆讯。