17歲仔都咁潺？耶馬肌肉疲勞退隊

西班牙將於周三(16日)凌晨歐國聯主場對塞爾維亞，賽前「鬥牛兵團」收到不利消息，翼鋒拉明耶馬因為肌肉疲勞退隊，無緣參賽，再次令人關注賽程太頻密問題，連呢位17歲後生仔都頂唔順。

據悉拉明耶馬已經離開西班牙大營，返回巴塞隆拿，佢並冇受傷，只係出現肌肉疲勞，領隊富安迪為安全起見，批准佢提早離隊。西班牙上場擊敗丹麥後排榜首，但「鬥牛兵團」首循環僅打和塞爾維亞0比0，今場缺少拉明耶馬，恐怕更加難入波。

巴塞隆拿未來3場比賽惡戰連場，包括西甲主場對西維爾，歐聯主場對拜仁慕尼黑，「國家打吡」作客皇馬，拉明耶馬體力將面臨重大考驗。