列斯占士復操　爭取上陣鬥曼聯

車路士隊長列斯占士因為受傷，今季仍然未上陣，早前更由於傷勢康復情況未如理想，需要延遲復出，呢位24歲右後衞現時終於可以參加操練，有望下月初上陣鬥曼聯。

列斯占士近年經常受傷，包括今夏季前熱身賽整傷腿筋，並一直缺陣，根據《ESPN》統計，呢位英格蘭國腳自從5年前升上一隊之後，已合共因傷缺陣129場比賽，名副其實係「玻璃腳」。因此，就算列斯占士近日已經復操，但估計領隊馬利斯卡都唔會急於要求佢參加比賽，以免再次受傷。

車路士今個月仲有4場比賽，包括下場英超對利物浦，歐協聯對彭拿典奈高斯，以及聯賽、英聯盃兩戰紐卡素，預料列斯占士暫時都無法踢呢4場波，估計佢可能等到11月4日凌晨英超作客曼聯，先至有機會披甲。

另外，車仔左閘芝維爾被領隊馬利斯卡打入冷宮，今季僅曾於英聯盃上陣1次，英國《太陽報》指意甲球隊拿玻里有意明年1月簽入呢位27歲英格蘭國腳。