巴洛迪利有望加盟熱拿亞　但存在一大變數

意大利「壞孩子」巴洛迪利今夏離開土耳其球隊代米爾之後，仍然未有球會收留，最新消息指意甲球隊熱拿亞教練基拿甸奴計劃簽入呢位34歲射手，但係基拿甸奴現時帥位不穩，「巴神」能否重返意甲仍然存在變數。

熱拿亞今夏將射手列迪古出售去阿特蘭大之後，鋒線頓失重心，加上爆發傷兵潮，導致成績愈來愈差，近5場聯賽僅1和4負，教練基拿甸奴希望盡快增兵救亡。

由於轉會市場要明年1月先至重開，現時只可以簽自由身球員，基拿甸奴非常欣賞「巴神」，認為佢可以提升球隊攻力。至於兩人能否合作，要視乎熱拿亞周六(19日)晚主場對博洛尼亞嘅賽果，因為一旦熱拿亞又輸波，基拿甸奴隨時會被炒，屆時熱拿亞未必會簽巴洛迪利。

早前傳出如果巴洛迪利未能重返意，只剩下兩個選擇，一係去保加利亞搵食，一係掛靴。