金球獎畀雲尼斯奧斯定洛迪？艾達臣揀咗佢！

備受注目嘅金球獎選舉今個月底舉行，今屆兩大熱門分別係巴西前鋒雲尼斯奧斯祖利亞，以及西班牙中場洛迪卡斯簡迪，同兩人分別係國家隊同球會隊友嘅艾達臣摩拉斯，日前就公開支持雲尼斯奧斯得獎。

艾達臣接受巴西《TNT Sports》訪問，對呢個「手掌係肉、手背又係肉」嘅問題，毫不避諱直接回應：「我支持雲尼斯奧斯，佢上季所做嘅事值得得獎，睇下佢贏嘅錦標、交出嘅入球同助攻......我撐雲尼斯奧斯，無論佢同洛迪邊個攞獎都係實至名歸。」

雲尼斯奧斯上季帶領皇家馬德里贏歐聯同西甲冠軍，各項賽事39次上陣，交出24個入波同11次助攻；至於洛迪就協助曼城贏英超冠軍，夏天又幫西班牙贏歐國盃冠軍，戰績同樣輝煌。