曼聯裁員裁過龍　費格遜遭「炒魷」

曼聯傳奇領隊費格遜退休後一直擔任球會董事及全球大使，不過呢啲角色今季後就會結束，據報新股東拉特克利夫接管球隊後大幅裁員，佢為咗削減開支，近日將刀口指向費爵爺，費Sir嘅全球大使職位做埋今季完結，不過搞咁多嘢，每年只係慳得酬金216萬鎊(約2,160萬港元)，唔少網友都認為此舉得不償失。

曼聯到今時今日仍然被稱為「勁旅」，好大程度歸功於費格遜，費Sir退休多年仍然係曼聯標誌性人物，因此格拉沙家族咁縮骨都願意給予費格遜豐厚酬金，而費Sir亦好識做，多年來全球大使同球會董事都係掛名，甚少干涉球隊事務，大家相安無事，但拉爵一接手，竟然向費Sir落手。

據報拉爵同費Sir進行面對面交談，已經和平解決此事，費格遜卸任全球大使，停發每年216萬鎊酬金，但就保留非執行董事職位，每次比賽仍然可以入場睇波。

拉爵早前大幅裁員，接近費格遜消息人士指，費Sir眼見好多老同事被裁失業，感到好難過，估唔到自己都成為被裁一員。