曼聯冬窗送走安東尼　出售或外借均可

曼聯巴西翼鋒安東尼馬菲奧斯今季僅上陣4次，唯一正選上陣係英聯盃，逐漸被人遺忘，據報會方唔想再拖落去，打算冬窗將佢送走，出售或外借均可，紐卡素、水晶宮，甚至佢母會阿積士都表示興趣。

雖然安東尼係坦哈格嘅阿積士嫡系，2022年花費1億歐元轉會費買入，但兩年多86場只入12球，證明係入錯貨，坦哈格依家自身難保，更加唔會保佢，仲曾經警告佢要提升表現，今季只曾在聯賽兩次後備上陣，歐霸盃一次後備上陣，只有英聯盃一次踢足全場。

報道指，曼聯決定送走安東尼，立即吸引紐卡素同水晶宮探盤，阿積士亦有意召佢回巢，估計曼聯只能收回當初轉會費嘅20%，不過無論去邊，安東尼嘅曼聯之旅已經走到尾聲，除非呢段時間有重大轉機，否則佢多數會喺冬窗離隊。