葡萄牙慘遭悶和　C朗入波斷纜又發脾氣

周三(16日)凌晨歐國聯A1組賽事，葡萄牙作客蘇格蘭被悶和0比0，39歲老將C朗拿度雖然踢足90分鐘，可惜未能延續今屆場場入波走勢，喺完場後又再發脾氣，不斷投訴同發洩，又拒絕答謝球迷直接走入更衣室。

葡萄牙今場由連續3輪有士哥嘅C朗掛帥，但受制於蘇格蘭嚴密防線，真正入肉埋門極少。踢足全場嘅C朗有4次射門，但只得1次命中目標，其他隊友發揮亦喺水準以下，最終0比0握手言和。

C朗完場後情緒爆發，不斷口噏噏同揚手投訴，甚至做出「手指公向下」嘅柴台動作，矛頭指向今場執法球證。作為葡萄牙隊長嘅C朗，更冇按慣例帶領隊友去答謝隨隊作客嘅球迷，而係黑晒面直接返入更衣室。

葡萄牙領隊馬天尼斯賽後表示：「我哋其實踢得唔差，就係爭少少魔法時刻，大家應該誇獎蘇格蘭嘅防守，佢哋成功令葡萄牙入唔到波。」對於C朗完場後冇去答謝球迷，馬天尼斯就拒絕評論：「我冇留意，所以答唔到你。」