艾歷臣1射1傳救丹麥　海倫慘成毒瘤

丹麥中場基斯甸艾歷臣寶刀未老，周三(16日)凌晨歐國聯A4組賽事，呢位曼聯中場交出1入波同1助攻，協助丹麥作客2比2逼和瑞士。32歲嘅艾歷臣今季喺曼聯同丹麥，已經交出6個入波同5次助攻，佢嘅復甦係曼聯球迷喜訊。

瑞士上半場26分鐘由費奧拿先開紀錄，不過丹麥1分鐘後閃電追平，艾歷臣快開罰球畀伊沙臣射入；完半場前瑞士獲得12碼，由安杜尼操刀建功，不過艾歷臣再度拯救丹麥，佢喺69分鐘接應賀積查治頭槌二傳射入，助丹麥追平2比2完場。

雖然做過心臟大手術，但艾歷臣愈老愈可愛，今場佢踢足90分鐘，40次傳球有35次成功，當中3次更加係關鍵傳球，另外仲交出6次助攻同5次長傳，係丹麥嘅進攻靈魂，難怪連曼聯都要繼續搵佢做中場主力。

相反另一曼聯前鋒海倫就令人失望，傳球成功率不足6成，全場只得1次射門，踢唔夠1個鐘頭就被換走。海倫喺丹麥國家隊入球荒已接近1年，對上一次為丹麥入波，已經係上年10月對「魚腩球隊」聖馬力諾。