艾历臣1射1传救丹麦　海伦惨成毒瘤

丹麦中场基斯甸艾历臣宝刀未老，周三(16日)凌晨欧国联A4组赛事，呢位曼联中场交出1入波同1助攻，协助丹麦作客2比2逼和瑞士。32岁嘅艾历臣今季喺曼联同丹麦，已经交出6个入波同5次助攻，佢嘅复苏系曼联球迷喜讯。

瑞士上半场26分钟由费奥拿先开纪录，不过丹麦1分钟后闪电追平，艾历臣快开罚球畀伊沙臣射入；完半场前瑞士获得12码，由安杜尼操刀建功，不过艾历臣再度拯救丹麦，佢喺69分钟接应贺积查治头槌二传射入，助丹麦追平2比2完场。

虽然做过心脏大手术，但艾历臣愈老愈可爱，今场佢踢足90分钟，40次传球有35次成功，当中3次更加系关键传球，另外仲交出6次助攻同5次长传，系丹麦嘅进攻灵魂，难怪连曼联都要继续搵佢做中场主力。

相反另一曼联前锋海伦就令人失望，传球成功率不足6成，全场只得1次射门，踢唔够1个钟头就被换走。海伦喺丹麦国家队入球荒已接近1年，对上一次为丹麦入波，已经系上年10月对“鱼腩球队”圣马力诺。