美斯瘋狂創造5球　全場球迷膜拜

周三(16日)早上世界盃外圍賽南美洲區，阿根廷主場以6比0狂勝玻利維亞，球王美斯創造5球，包括上演「帽子戲法」射入3球及2次助攻，堪稱神級演出，全場球迷都對佢佩服得五體投地，一齊站立向呢位37歲老將做出膜拜動作致敬。

阿根廷上場世盃外大熱倒灶，被委內瑞拉逼和1比1，美斯踢足全場冇表現，遭輿論嘲諷已「回塘」。呢位巨星今仗大踢身價波，開賽19分鐘單刀射入打開紀錄，臨完上半場作出2次助攻，分別傳畀拿達路馬天尼斯、祖利安艾華利斯射入，上半場領先3球。

換邊之後，後備上陣嘅堤亞高艾美達都入番1球，雖然大局已定，但美斯並冇留力，最後6分鐘再射入2球，完成「帽子戲法」，全場數萬球迷起立向佢膜拜致敬，甚至有人激動落淚。

美斯今場射入3球之後，職業生涯總入球數字增加至846球及377次助攻，阿根廷現時排南美洲區榜首，領先第2位哥倫比亞3分。