杜蘭今季第6次後備上陣入波　哥倫比亞派4蛋

周三(16日)凌晨世界盃外圍賽南美洲區，哥倫比亞主場大勝智利4比0，前鋒祖漢杜蘭繼續扮演後備殺手角色，下半場上陣射入1球，今季球會及國際賽第6次後備上陣入波，認真神奇。

哥倫比亞控制大局，踢到34分鐘由中堅達雲臣山齊士頭槌破網打開紀錄，下半場初段，占士洛迪古斯傳畀路易斯迪亞斯射成2比0。

之後成為2位後備上陣球員表演時間，哥倫比亞打反擊，史尼斯泰拉盤球長驅直進，妙傳畀祖漢杜蘭射入，補時史尼斯泰拉自己都入番1球，贈智利4蛋，排南美洲區第2位，落後榜首阿根廷3分。

效力英超球隊阿士東維拉嘅祖漢杜蘭，今季頻頻後備上陣入波，打出名堂，根據統計，包括今場世盃外在內，呢位20歲前鋒今季各項賽事，已6次後備上陣建功，另外5次分別對韋斯咸、李斯特城、愛華頓、狼隊、拜仁慕尼黑，難怪網民認為佢「最佳位置」係後備。