杜曹打救美臣蒙特？英格蘭4大邊緣人望翻身

德國名帥杜曹即將成為英格蘭領隊，呢位前車路士教頭對英格蘭絕不陌生，曾經同眾多英格蘭國腳合作。杜曹嘅上任令4位「三獅兵團」邊緣人重燃入選希望，其中美臣蒙特最受睇好。

美臣蒙特上季加盟曼聯後表現令人失望，但呢位25歲中場一直係杜曹愛將，佢喺2021年嘅爆發就係由杜曹領軍，兩人一齊幫車路士贏埋歐聯冠軍，美臣蒙特喺杜曹手下上陣87場入19球。

杜曹曾表示美臣蒙特係不可或缺：「用人唔係齋睇數據，美臣蒙特嘅態度、感染力同鬥志都好重要，就算踢唔得好，都好難將佢棄用，只要佢喺球場，就帶畀球隊能量同正面態度。」

除美臣蒙特之外，杜曹喺車路士教過嘅列斯占士同史達寧，以及喺拜仁慕尼黑共事嘅艾歷迪亞，依家都冇份入國家隊，佢哋之前都喺杜曹麾下踢出高水平表現，嚟緊有機會再得到「翻生」機會。