簡東拿鬧爆曼聯炒費Sir　里奧提陰謀論

曼聯新老闆拉特克利夫上任後，一直實行開源節流計劃，估唔到最近竟然「炒」埋傳奇費格遜，廢除佢曼聯全球大使職務。曼聯「大帝」簡東拿亦睇唔過眼，發文炮轟曼聯管理層製造醜聞，應該要「掟入屎袋」。

費格遜昔日「曼聯王朝」核心簡東拿，向來都係有嗰句講嗰句，眼見恩師被拉特克利夫「開刀」，呢位法國傳奇喺社交網留言炮轟：「費格遜喺死之前，應該可以喺曼聯做任何佢想做嘅事。(炒魷)實在係缺乏尊重，完全係一宗醜聞。費Sir永遠都係我嘅波士！我要將佢哋(曼聯管理層)全部掟晒入屎袋！」

另一費Sir愛徒里奧費迪南就提出陰謀論，指拉特克利夫咁做唔係單純「慳錢」，而係要借踢走費格遜嚟立威：「如果連費格遜都可以踢走，咁曼聯上下冇一個人係絕對安全，依家所有人都明白呢點。英力士集團係想將呢個訊息傳達畀曼聯『所有人』。」