夏利列納質疑杜曹　揭破英格蘭殘酷現實

英格蘭足總聘請德國領隊杜曹執教國家隊，呢次任命引起唔少爭議，英國《每日郵報》就以「英格蘭黑暗一天」形容杜曹上任，前熱刺領隊夏利列納亦公開質疑杜曹，指佢嘅履歷稱唔上「成功」，但就揭開英格蘭足壇殘酷現實──英格蘭領隊冇個掂！

現年77歲嘅夏利列納，過去曾經好接近成為英格蘭主帥，佢對杜曹上任就抱有質疑：「我唔覺得杜曹係個好成功嘅領隊，佢喺幾間球會都教得唔耐，我係個愛國者，覺得英格蘭領隊好應該由英格蘭人出任。」不過，夏利列納亦講出重點：「好明顯，英格蘭領隊冇乜選擇，依家英超只得2、3個本土領隊，所有球會都係外國班主，肯定會用晒外國領隊，可憐足總放咁多錢培訓教練...結果係令人傷心。」

事實上，之前傳出候選嘅本土教頭，只得依家未有班落嘅樸達，同埋紐卡素領隊艾迪侯域，另外2位英超本土領隊就係戴治(愛華頓)同加利奧尼爾(狼隊)，最多加埋法甲球會朗斯嘅少帥施迪爾，但佢哋目前「級數」有限，搵外國領隊執教亦係無可厚非。